高踭鞋同足球大纜都扯唔埋，前者凸顯女性嘅嫵媚形象，後者則係汗味同剛陽味濃嘅運動；形成強烈對比嘅兩者，加起嚟卻令一位阿根廷𡃁模成為街頭明星！
阿根廷球星輩出，估唔到連球王美斯嘅平民同鄉都腳法靈巧。近日有位24歲長腿美女Fiorella就憑其令人眼前一亮嘅花式足球，紅遍阿根廷街頭；佢絕非「揸流攤」得個樣，腳踏3吋高踭鞋、身穿小背心熱褲嘅Fiorella，喺街頭純熟「的」波，美腿半秒間就喺空中圍住個波繞一圈，簡直視高踭鞋如無物，起腳好似赤腳咁自在。企喺度「的」波固之然係easy job，「瞓身」交叉換腳「的」波亦難唔倒呢位陽光少女；性感長腿加上控球自如，人靚身材火辣兼腳法勁，難怪成為男士們嘅新足球教主！
要做人氣𡃁模，係要有一兩樣技能傍吓身嘅。文：呂晨
