服裝股堡獅龍（592）午後報喜，預期截至去年底止中期業績，按年錄得大幅增長，刺激股價爆升26%，但從各項指標睇，大升浪只係處於開端。
堡獅龍成功大翻身，主要靠控制內地及台灣業務成本，以及內地店舖生產效率提升。睇番6月底止全年業績，中台兩地嘅店舖總數，短短一年時間由700間喪減至385間，證明呢招非常有效，管理層肯大刀闊斧做嘢，抵讚！
幫堡獅龍計計數，2012年度上半年賺3,409萬銀，下半年蝕1,188萬銀。保守估計2013年度上半年盈利增長五成，即5,114萬銀，又保守估計下半年盈利表現一樣，則全年賺1.02億銀，市盈率即刻得番10.8倍，比佐丹奴（709）嘅預測市盈率12.9倍，折讓16%。
唔好忘記，呢個只係保守估計，一旦增長超預期，市盈率肯定得番單位數。秤身家，堡獅龍現價PB 1.5倍，佐丹奴3.1倍，堡獅龍折讓52%，又係平足一條街。
雖然舊年業績唔算標青，但堡獅龍派息依然慷慨，現價息率4.2厘，今年業績突飛猛進，派息肯定更疏爽，絕對係有升有息嘅選擇。睇圖表，堡獅龍周線圖蓄勢突破圓底頸線，一旦破位，目標直指1元！
唐牛