海迪有位朋友經常笑稱華南城（1668）做「怪誕城」，因為公司個business model實在古怪。但更匪夷所思嘅係，華南城居然找到股王騰訊（700）入股，堪稱2014年首件奇人異事。
華南城其實係地產商，有超過90%收入都是來自出售物業，公司和各地政府合作，建批發中心連商住項目，然後賣樓、賣舖搵錢。其實N年前搞B2B，都識上網轉用阿里巴巴啦，何況今時今日，做商貿搵生意，仲點解需要長期租用一間實體店？
華南城都知道要轉型，呢間公司無嘢多，最多嘅就係「地方」（你話佢個場有幾多人租？），咁不如好好利用，租出去做倉庫啦。但齋叫「倉務」，聽落唔夠sexy，所以公司在年報稱呢項服務為「一站式物流」。但呢項服務似乎就真係得一個站，就係個倉，就連「駐場運輸及配送」都係由第三方提供，即公司其實無自己車隊，無配送網。去年度華南城嘅收入breakdown中，無物流呢個分類，反映這項業務發展根本未成氣候。
阿里巴巴投資海爾（1169）搞物流，非常合理，因為海爾本身就係做開呢一瓣。但你話買一間其實是做開地產生意嘅公司搞物流？海迪會替騰訊覺得「牙煙」。華南城有大量在建項目，等錢使早就一街都知。
去年4月基金PAG願意投資，但就好醒目選擇用CB。騰訊如今竟「現兜兜」入股，海迪只覺得騰訊未免太純品了。
海迪