「嬲」字政改三人組噚日飛走林鄭月娥，加入陳智思，拍住袁國強同譚志源，以全男班姿態喺午飯時間，殺入中環皇后像廣場派政改單張。要資深大律師拋頭露面，難怪「剩男強」有少少怕醜唔多慣，齋派唔開口同市民「有商有量」。查實成班傳媒圍住佢團團轉，搞到市民唔敢埋佢身，令佢一度叫傳媒畀啲空間佢。雖然被市民請食檸檬，剩男強似乎唔多介意，佢話「可能（市民）係趕時間，可能佢哋已對政改諮詢好清楚」，但相信唔係政治冷感喎。
相對下譚志源就好風騷自若，仲主攻疑似「遊客」嘅外籍人士，細心作詳細講解，擺明邀請外國勢力干預特區政改；青靚白淨嘅行會「男神」陳智思好受女性支持，唔少女fans上前影佢相。為免太陽盛陰衰，食衞局政治助理陳凱欣同勞福局政助黎穎瑜噚日都落場幫手做佈景板。
垃圾桶現劉江華「墨寶」
原來政府派嘅「福」字揮春，出自政制及內地事務局副局長劉江華手筆；但最終有唔少「墨寶」，流落喺皇后像廣場附近嘅垃圾桶內。
除咗揮春，政府都出埋「有商有量」利是封，財爺鬍鬚曾會喺周六出席一個長者活動時大派利是……封。唔知拎咗呢個利是封後，裏面啲錢有幾多，係咪同樣有商有量？