里昂風水指數嘅蛇年預測，無論係指數或個別板塊都錯到離譜，噚日推馬年預測就跟大勢，將舊年開始大熱嘅科技板塊，由「凶」轉評為「吉」，又推算馬雲旗下阿里巴巴可以成功在港上市，完全睇好成個板塊，可能想一鋪贏番，搣甩「明燈」銜頭。
被問到蛇年預測跟實際情況背馳，里昂分析員高頌妍似早有準備，輕鬆解釋風水指數已有廿年歷史，有時估得準，有時估唔準，有時只係估遲咗，其實唔少預測都正確，所以佢哋都唔在乎一、兩年嘅失誤。
里昂對於馬年嘅預測，最大改變可以話係對科技網絡板塊嘅睇法有180度改變。里昂認為今年屬「木」、屬「火」嘅板塊會大旺，分別睇好零售、農業，同埋科網、電訊股，料今年表現最好。
至於屬「水」嘅濠賭股，即使舊年開始狂升，但里昂堅持畀個「平」嘅評級。至弱嘅板塊就係屬「土」嘅房地產，獲評為「凶」。
料阿里成功在港上市
里昂又揀咗人氣嘅馬雲去講，推算馬雲今年雖然麻煩事多，但佢嘅命格擁有「木」同「水」嘅完美組合，係理想掌舵人，阿里巴巴今年仲可以按佢嘅「小風格」（應該講緊同股不同權方式）在港成功上市㖭。
指數方面，里昂認為恒指今年會好似馬嘅特性咁，「一馬當先之後，再跳跳紮」，即係先升後反覆囉，恒指最高目標去到兩萬八，較里昂分析員早前以基本因素推論嘅兩萬六，仲要高！
林恬兒旗袍省鏡
近年里昂風水指數記者會，其中一大亮點係「娛樂大亨」林建岳愛女林恬兒（Emily），佢喺里昂做銷售經理超過三年，跟過去兩年一樣，噚日再度化身索女風水師，負責以流利嘅中英文講解五行板塊喺新一年嘅走勢。
今年佢束起馬尾，穿上藍色旗袍，配三吋黑色高踭鞋，比舊年穿起闊身唐裝衫，更加搶眼，輕易艷壓全場。可惜佢又係一完場，就喺公關護送下離開，留底其他同事應付傳媒提問，傳媒完全埋唔到佢身。
李華華
mailto:[email protected]
