年近歲晚，盜賊猖狂，近日時有西貢清水灣及港島南區豪宅嘅凌晨爆竊新聞，可知各路盜賊紛紛趁住天氣寒冷，住客熟睡時趁機下手。同時亦有「祈福黨」周圍打電話搵食，正是「橋不怕舊，最緊要受」。沙田陳師奶在1995年時居於沙田第一城，某日收到一個電話，聲音好似係舊同事阿Joe，於是隨口應一句：「阿Joe呀，搵我做乜？」對方即答：「係呀，阿Joe呀，咁咁咁，因細佬撞車傷人，急需兩萬銀賠湯藥，佢冇錢，我一時之間人在深圳，你好唔好借住兩萬元俾我，放在你樓下花槽底，我叫細佬去攞。」陳師奶一時好心，嗱嗱聲去第一城恒生提取兩萬元，好彩行返第×座之時，手提電話響起，係老公自公司打嚟嘅，老公問：「做乜你唔喺屋企嘅，我今晚有應酬不回家。」陳師奶於是講及提款之事，俾老公大喝一聲：「且慢，你打電話俾同事仄多一次先。」哦，一打電話就知道上述故事純屬虛構啦，執番一身彩。
點知十九年後，一月二十日陳師奶細妹在家又收到類似電話，聲稱來自加拿大，細妹又犯上同一錯誤：「你係阿林呀，有乜事呀？」對方立即自稱阿林（即是細妹的近親），話啱啱轉工，特來電通知新電話，細妹於是抄低放入iPhone，次日一早，iPhone鈴聲響起，來電顯示係阿林，於是接聽，「阿林」聲稱派咗一位夥計A到深圳公幹，點知在夜店飲酒俾公安拉咗，要五萬銀去保夥計A出嚟，請細妹代為籌謀，交五萬元俾另一位阿林夥計B，阿B就會撲上深圳營救阿A。講到呢度，細妹開始發覺呢個「阿林」嘅聲音、口音、用語，有啲內地味道，而且全無英文夾雜，唔似加拿大華人噃，於是問對方幾條加拿大問題，例如多倫多今日凍成點呀，多倫多明報有冇香港明報換總編輯新聞呀之類，「阿林」開始口啞啞，跟住立即收線。細妹叫醒老公，講番晒古仔出嚟，老公大笑：「警訊播到殘晒，祈福黨呀！」事後近親紛紛向細妹提醒：「以後收到類似電話，第一句就講，你係振英呀？」如果個賊夠膽認，肯定就係講大話啦！呢類電話應係隨機抽樣式，賊人一日打幾十至幾百個電話，希望至少有一位仁姐仁兄上釣。本來係陳年舊橋箒，阿婆都識，但若然你係當事人，收到電話時，又會唔會老實到講一句：「你係沙膽雄呀？」咁嘅說話呢！