上季贏咗英聯盃同喺英超排第9嘅「天鵝」史雲斯，今季唔知係咪中咗禽流感，喺英超踢得唔好之餘，仲要內訌。我求大俠以為只係拳頭交，但原來好大鑊，事關捷高攞埋武器，想用磚頭襲擊隊友蒙克，而且仲鬧到上差館。好彩冇人受傷，警方亦冇起訴捷高，將事件交番畀史雲斯自己處理。
嚇到球迷報警求助
聽消息人士講，史雲斯單嘢喺上周五發生，當時捷高同蒙克練練吓波嘈起上嚟，捷高更加失控，隨手拎起嚿磚頭，似係想用嚟打蒙克。現場有球迷（相信係史雲斯一個青年軍嘅媽媽）見唔對路，立即報警求助。南威爾斯警方事後亦證實有球員喺練習場發生爭執。佢哋發聲明話：「喺1月17號禮拜五晏晝1點半，警方接報到練習場。同球會職員傾過之後，警方冇採取任何行動。」史雲斯嘅發言人亦話：「捷高同蒙克有言語上嘅衝突，呢種事其實好普遍，但就冇打交。相信係有球迷報警，警方嚟到之後見冇乜嘢，所以冇採取進一步行動。呢單嘢經已解決，而且已告一段落。」
隊內派系鬥爭嚴重
捷高同蒙克涉嫌喺練習場打交，帶出咗史雲斯嘅派系問題。史雲斯陣中多西班牙球員，有8個咁多，而且搞小圈子，仲覺得佢哋高高在上，結果令天鵝陣中班英國幫好唔老利。捷高喺2012年7月由熱拿亞加盟，但由於打得好，所以好快就上位。但係佢就好自我中心，同喺蒙克開拖之前，就喺上周中嘅球隊會議上，無啦啦失蹤唔見人。
雖然捷高接連搞出事，史雲斯領隊勞特立都冇雪佢，仲畀佢喺禮拜日主場對熱刺場英超打正選，點知佢自己唔爭氣，而且擺咗個烏龍，連累球隊最後輸1:3，連續8場聯賽贏唔到，目前排第15位，有可能要打護級戰。家陣英國傳媒爆佢大鑊，睇嚟勞特立唔可以再臭屎密冚，要做番啲嘢，若然唔係，隊內嘅派系問題只會越嚟越嚴重。