政府將大浪西灣納入西貢東郊野公園，惹來鄉議局嘅強烈不滿，鄉議局早前向全港27條鄉啟動「維護權益．廿元捐款運動」籌款，希望住喺各鄉嘅幾十萬人，一人捐20蚊，成立抗爭基金，用嚟搞集會、登廣告，同政府駁火。
鄉紳個個講就豪氣，但係籌款戰績慘淡。負責籌旗嘅召集人巫家雄噚日喺鄉議局大會上宣佈，至今只係籌到32萬，籌款成績令人失望，批評有啲鄉一蚊都冇捐過，如今仲欠29萬，所以即場揼心口，叫人人捐20蚊。
主席劉皇發嫌20蚊太少，問「可唔可以捐多啲？」即時一口氣捐咗2,000蚊，其他鄉議局執委見到發叔捐咁多，個個都起碼攞張紅衫魚出嚟，點好意思捐20蚊呀。