江湖傳聞，有男人為了鋪設一條完美過澳門的康莊大道，不惜自幼培育對賽車的興趣。
養兵千日，用在一朝，每年的澳門格蘭披治賽車，都是男人光明正大過大海的絕佳時節。「我要同阿強阿祥過大海睇賽車。你知㗎，我一向鍾意車。」
其他豬朋狗友，平時不燒香，臨急先扮城城落場鬥車，Sorry請你講出舒麥加以外的賽車手名字……你連錢嘉樂都答唔到，點幫你啊？
即使男人真的去嫖，恭喜你，他沾上的也是傷害性最低的嗜好。
嫖，豐儉由人，正所謂一千幾百，總有辦法，鮮有聽聞因嫖而破產。就算你性上癮，你細佬都會抗議：大佬，「周休二日」喎。生理局限自動幫你定下止蝕位。
毒，請嘗試把一泡尿儲埋然後強逼自己分開十幾次屙，屙屙吓要懸崖勒馬，嗰種欲言又止的痛苦，也是索K尿頻的滋味。
即使你想把老豆副身家索K索晒，但你副偈唔容許你秒秒鐘索K，無人會一次過買十萬蚊K仔自用吧？你副家產至少可以索幾年。
賭完全不同，賭的殺傷力，完全可以一秒鐘一鋪牌便清你祖宗十八代的身家！我見過澳門賭場的百家樂，每注五千元，有個非常老土核突的大陸西裝男人，坐下、換籌碼、荷官call人「唱十萬蚊啊」、下注、揭牌、輸錢、五千！前後唔夠一分鐘，佢坐一坐已經無咗五千蚊！！那十萬元的籌碼，夠他玩十五分鐘嗎？
如果你是富二代，你玩女人，可能玩到腎虧，但身家唔會點虧；你沾上毒癮，分分鐘你吸毒死但副身家都未敗晒。但如果你有賭癮，恭喜你，你老豆朝早出門可能仲係首富，下午返嚟已經要乞食。
講咗咁耐，都係想話俾女人聽：Honey，好彩我係去嫖咋……