2014年開始咗冇耐，立法會小組已經流會！立法會房屋事務委員會噚日朝早8點半就施政報告召開特別會議，由運輸及房屋局長張炳良簡報，點知過咗15分鐘，除咗主席王國興，只有謝偉銓、方剛同郭家麒四人出席，最終唔夠法定人數八人而流會收場。王國興會後表示遺憾，話秘書處前晚已經通知委員出席，立法會主席曾鈺成就話缺席者欠市民一個交代。原來最初有14個委員事前話會出席，包括當時撞咗會、開緊行管會嘅葉國謙，佢事後話8點46分先收到秘書處通知房屋panel唔夠人，建議秘書處檢討，否則佢可以趕過去㗎。其他人呢？陳克勤病咗、石禮謙去睇醫生、馮檢基塞車遲到，另外張超雄、陳偉業、黃毓民、梁家傑、梁國雄、田北辰、梁志祥、麥美娟、盧偉國、謝偉俊都冇影。李卓人一早回覆約咗團體傾政改而請假。