年年都齋派利是，悶唔悶啲呀？今年可以搞搞新意思！新生代創作人Stephen最近設計咗一款新式利是封，裏面除咗可以放錢，仲可以錄低賀年說話，等收利是嘅人唔單止有錢落袋，仲可以親身感受派利是者嘅祝福。
其實呢款咁潮嘅利是封係Stephen夥拍沙田一個大型商場嘅傑作。佢話好耐以前，利是係叫紅紙，入面放嘅唔係銀紙而係寫上祝福字句嘅紙，當然𠵱家個個重視銀紙多啲，反而忘記咗利是嘅意義，所以諗到用可以錄音嘅紙做利是封，加上佢覺得中國人素來都唔係好識表達感情，錄音就冇咁尷尬嘞。呢個利是封仲搵嚟殿堂級設計師靳埭強設計，以文字山水方式寫上「福」字。喺電影《六樓后座》飾演Sexy Suzy嘅侯煥玲婆婆都大讚呢隻利是封夠晒潮，可以將佢嘅心聲寄畀身處挪威嘅契仔。呢款利是封冇得賣㗎，要喺沙田新城市廣場消費滿2,500元先有得換。