【本報訊】《am730》及《蘋果日報》突被有組織抽廣告,壹傳媒主席黎智英昨表示,集團一直遭受中資機構等大財團抵制,曾估計每年廣告收入因而損失二億元。但他承諾為免子孫罵他「契弟」,不會讓大財團「買起」壹傳媒。
指佔中是爭普選希望
黎智英接受商台《在晴朗的一天出發》錄音訪問時說,以往抽廣告的包括在內地業務龐大的公司,加上最近銀行大戶也突抽廣告,壹傳媒確實承受廣告壓力,「一年我哋冇嘅廣告,以前嚟計,都超過兩億。係咪政治壓力,或者其他嘢得罪人哋就唔知」。
主持人陳志雲問他廣告商曾否明言不滿壹傳媒立場,黎說:「我覺得冇人咁白癡,叫你唔好咁寫會抽,俾你揸住話柄。個個都係暗啞底咁抽」。
黎智英強調,目前集團數碼化轉營成績理想,暫時不會結業,「如果蝕到我飛起,都頂唔到嘅,但係𠵱家都唔會」。壹傳媒以往多次傳出賣盤,陳志雲問道:「如果有人畀好多錢買起你個集團,會唔會考慮?」黎說,這筆錢再多也難以洗脫「契弟」污名,「如果我啲子孫第二日話,我老竇好有錢,不過契弟嚟㗎,咁我點呢?你畀幾多錢我都唔肯做契弟嘅大佬。」台灣《蘋果日報》去年賣盤,親北京財團一度打算入主,最終拉倒。
對於2017年能否實現真普選,黎坦言不敢抱厚望,但佔中「係唯一可以爭取到普選嘅少少希望」。他斥特首梁振英在施政報告為挽民望亂派錢,種下加稅禍根,最終窒礙經濟發展。黎認為,推動經濟的最佳方法就是減稅,「應該做嘅佢唔做,將啲錢去買民調,我覺得梁振英係梁振英囉。」
壹傳媒平面媒體行政總裁葉一堅表示,集團刊物多年來遭中資機構及大地產商杯葛,黎曾估計每年因此損失二億元廣告收入。至於最近銀行等大戶突然抽廣告對集團的損失,目前難以估計。