俗語話球場得意情場失意，皇家馬德里前鋒基斯坦奴朗拿度（C朗、左）就打破咗呢個慣例，月初拎完金球獎，周一仲獲葡萄牙總統席爾瓦（右）頒發大十字勳章㖭。而C朗同女友艾琳娜嘅感情都好穩定，據報C朗喺金球獎頒獎禮前，已經送咗隻8萬歐元（約85萬港元）嘅白金勞畀艾琳娜，作為訂婚禮物；不過C朗之前為獎勵5位皇馬軍醫，一人送一部車，今次訂婚禮物好似出手低咗啲喎。據報艾琳娜已經「Say yes」，C朗亦開始籌備婚禮，仲準備喺家鄉馬德拉島附加50公里嘅聖港島，作為婚禮地點，不過具體日子就未公佈，睇嚟都係等埋巴西世界盃完咗先完婚，如果幫葡萄牙拎埋首個世界盃後先做新郎哥，仲唔威過威士忌？