成日俾人恥笑靠派蛇齋餅糭起家嘅民建聯，舊年蛇年玩自嘲，喺年宵市場打正旗號發售蛇齋餅糭福袋。佢哋就話福袋反應好，未到年三十晚就賣晒5,000份，所以今年決定再加碼。呢個馬年第二代民記福袋，除咗有米……粉、有罐頭，仲加入咗價值198大元嘅高科技電子產品㖭呀，但係就大幅加價36%囉！睇嚟今次街邊啲阿婆阿伯要打醒十二分精神喇！
民記呢個第二代福袋，裏面有米粉、烏冬、豆豉鯪魚、粟米蓉，最大嘅突破，就係有部原價198蚊嘅數碼收音機呀，夾夾埋埋，雖然只係賣68蚊，但係就比起舊年嗰個有冬菇、瓜子、餅乾嘅蛇年福袋，貴足18蚊，即係漲價三成六喎！民記副秘書長葉傲冬話，個收音機係向DBC以優惠價攞貨，佢哋都係收番成本咋喎。
七成人派20蚊以下利是
唔……八方心諗，DBC自從俾黃楚標玩晒之後，同民記又行得咁埋，睇怕未來都係會專心做河蟹電台喇啩。不過有咗呢部收音機，一樣可以用嚟聽吓香港電台數碼廣播箒。
新年前夕，民記就喺本月初訪問咗703人，話六成市民打算行年宵花費少於300蚊，大部份用嚟買年花同應節食品；另有七成人封利是會係20蚊以下，大手筆封100蚊以上就得2.3%。睇嚟民記嘅被訪者，今年都相當「審慎理財」喎！
李八方
mailto:[email protected]
