最近喺jobsDB有個招聘廣告吸引好多人注意，特別係做開分析員嘅曼聯球迷，呢個廣告正正就係曼聯在港招聘研究分析員，負責研究市場情況同搵生意機會，職責包括建立商業資料庫同寫研究報告。雖然呢份係全職工作，不過廣告寫明合約期係三個月，按表現可能有機會轉為長工咋喎。
曼聯早幾年有意來港上市，不過因為要求分開A、B股上市，未被香港接受，最終於2012年喺美國上市。舊年底有消息指，曼聯有意進軍內地網遊市場，同幾間內地網絡遊戲開發商接洽，合作推社交遊戲進攻中國市場。咁啱曼聯上周出招聘廣告在港請分析員，唔知同發展內地網遊生意有冇關係呢？香港呢個寫字樓又係支援曼聯在亞太區嘅發展。
根據廣告，曼聯對應徵者嘅要求唔算高，冇話一定要係曼聯球迷，基本要大學畢業，最好主修商業管理，其中一點比較有趣就係要求應徵者可以有效同專業咁應付電話查詢，咁當然亦要對品牌發展同市場推廣（唔止體育）有熱誠啦。曼聯球迷不妨諗諗佢。