環境局局長黃錦星唔單止個樣同惜食運動入面隻「大嘥鬼」神似，原來佢個人都係名副其實嘅大嘥鬼。話說佢噚日出席屯門區議會傾廢物管理，本身議題都夠晒惹火，不過佢偏偏唔識死，唔單止玩遲到，連會議文件都係開會前一刻先派，結果俾班議員大鬧敷衍、唔識尊重、又嘥紙造成浪費，都唔知點信政府有誠意。
到咗會議尾聲，黃錦星為兩件事解釋。佢先自嘲係大嘥鬼，話廢物管理涉及事項太多，諗住整份精簡版開會，點知遲咗交，搞到要印出嚟派，變相製造廢物。佢老哥仲話以後會早啲交畀大家上網睇喎。至於開會遲到10分鐘，佢就賴落屯門公路有交通意外塞車，有區議員就寸佢，塞車問題都係堆填區有份搞出嚟，叫佢認真反省！