紅日娛樂公司主席朱壽仁（朱主席），去年與彭家麗在慈善騷合唱《從不喜歡孤單一個》唱到走音甩beat而成為話題人物，被封走音主席，雖然朱主席被網民恥笑騎呢，但他對自己歌藝依然信心十足，除稍後推出賀年MV外，更準備自資出CD「饗」粉絲。
記者昨日致電朱主席求證出MV一事時，他直認不諱說：「係呀，會由好資深音樂人作歌，我作詞，好大可能係林慕德，係賀年歌，有關香港繁榮發展，比較激勵性嘅歌。」何以有此構思？朱主席說：「香港始終係我土生土長嘅地方，歌詞好勵志、好正面、好過癮，為香港做少少嘢啦，希望香港發展更加好。」為香港人打氣？他說：「呢個一定㗎啦。」朱主席指新歌名為《和氣增才》，歌詞會是廣東話俚語，有點像許冠傑當年的廣東歌，屆時會放上網，派上電視台和電台，朱主席說：「希望佢哋接受得到啦！」
邀彭家麗續前緣
問是否會出經典金曲CD？朱主席說：「冇錯，會有廣東或者國語金曲，可能會修改吓歌詞或者melody。」朱主席表示考慮翻唱《從不喜歡孤單一個》，甚至找彭家麗合唱：「彭家麗當然係其中一個最好嘅選擇，但佢『騷』唔『騷』我呢？同埋佢𠵱家有唱片公司，都要睇吓點協調。」朱主席揚言會逐首歌放上網睇反應，然後再決定CD收錄哪些歌，但詳細計劃要稍遲才決定。問是否索性轉做歌手？他說：「其實我幾多樣化，唔止係歌手，我亦跳舞、運動，多方面都識少少，我主要係慈善企業家。」他強調唱歌純為興趣及娛樂大眾，並非為賺錢。
採訪：方圓
