《明報》加東版抽稿十幾篇，可想而知老細派呂家明去管劉進圖所為何事，整頓《明報》目的早已寫在牆上，而劉進圖本人仍顧左右而言他，實在令人失望。《明報》不論記者、評論員、專欄作者之所以俾老細及管理層睇死，係因為無論《明報》變成點、呢棚人仍然以為《明報》招牌帶來虛榮，以為畢竟《明報》代表知識分子風骨與良知，亦正因為呢種心態，令到政治權力為所欲為。
邊嗌唔好 邊就範
今日為《明報》抱不平者，好好反省一下為何幾年下來，咁多單政治干預傳媒事件，大部份人都詐作不知，《南早》變「紅早」，清除林和立、港台清除吳志森、《成報》改寫劉銳紹來稿、大班DBC事件、游清源被清洗，幾年下來定點清除本地傳媒人，一班所謂知識分子有冇出聲？有冇聯手反擊？即使《明報》本身，在處理呢類新聞時，又有冇給予高度重視？可以咁講，導致《明報》今日局面，《明報》中人及其代表之所謂知識分子有一分功勞，令傳媒老細更明目張膽去清洗整治所有唔聽話之傳媒人。
到今日終於輪到《明報》，呢種知識分子先至瞓醒識得嗌唔好，我係張曉卿、呂家明、翁昌文才不會怕你呢棚人。首先呢班人係唔敢亦唔會集體起身，畢竟《明報》二字仍帶畀大家一種虛榮，總有各式各樣理由合理化留在《明報》緊守崗位，老董式「留低比離開更難」邏輯又會出現，屆時《明報》管理層當然對知識分子們禮遇有嘉，至少當個青花古董花瓶，至於新聞編輯、社論就全部歸邊，以和諧為主旋律，幫閒文人功不可沒。知識分子比一份報紙脅持，你話奇唔奇？
HIT碼頭工人罷工，還有一股豁出去之氣慨，要逼資方讓步，總不會一邊維權，另一邊又擔心影響HIT、和記及超人名聲，打爛善長人翁招牌吧！如果咁搞法，咪俾人睇穿一邊嗌唔好，一邊就範。呂家明之所以在風頭火勢下仍抽稿，跟從老細指示，就表達出一種傲慢，睇死你班友嘈完又會乖乖地交稿！開天窗又如何，正所謂人不要面，天下無敵，一眾有風骨之人，能奈我張曉卿乜嘢何？
有人會認為，《明報》死咗，新媒體何來新聞抄。呢棚人有所不知，《明報》相比其他媒體如《蘋果》而言，對新媒體最不友善，警告呢個、警告那個，所謂新媒體抄《明報》新聞，才不會。那些依附《明報》之學者唔知就收聲。
《明報》因此執笠？才不會，正因有和諧功能，才不能執笠，否則如何對沖其他商業利益。
如果一個有理念之知識分子，你會選擇小罵大幫忙、為政府塗脂抹粉、關鍵時刻陰陽怪氣去影響學生及中產嘅《明報》，抑或寧願佢早執早着？
添馬男