人事部對於企業相當重要，唔少員工都對人事部又愛又恨。國泰航空（293）人事部董事羅禮祺（Nick Rhodes）舊年上場，坐低幾個月，決定要將部門改名，由personnel department改為people department，明顯係想人事部做嘢更加人性化。
國泰最新一期員工通訊《國泰天地》披露，人事部今年1月1日改名，呢個係羅禮祺履新後，用咗兩個月時間同管理層開會，集思廣益得出嘅結果。羅禮祺好坦白咁講，「其他部門普遍認為，人事部對程序和步驟過於偏重，更甚於員工本身」。
佢認為，人事部嘅角色係協助員工發揮所長，從而推動公司發展，希望部門改名有助達致呢個目標。
老實講，華華對於部門改名，就可以改變部門文化嘅成效存疑，不過羅禮祺有心推動，相信好多國泰員工舉腳贊成。