濠江賭業嘭嘭有聲，帶旺了澳門樓市。賭股瘋狂，咪甩保利達（208），集團濠江物業銷售斷百億入賬，博大增值兼博佢喺嚟緊3月派成績表時，有豐厚高息！
保利達喺澳門擁土儲770萬平方呎，但咪睇少呢個呎數。澳門大旺，房住宅土地供應又少，一屋難求。單係上年，澳門豪宅及中小型住宅樓價，就跑贏香港，按年大幅上升過30%。
再講，保利達呢批土儲，坐正港珠澳大橋落腳點，大橋喺後年就通車，土儲食住兩大優勢，真係生金蛋。
憧憬提早派高息
齋喺上年頭五個月，保利達預售部份項目，已經過百億銀，係成間保利達總市值44億銀嘅兩倍以上。又喺上年6月份，報載主席柯為湘話，有信心喺2013年keep住百億銀以上銷售。保利達肥仔水。
真係係咁意保守計數，成個項目都起碼增值/獲利70億至80億銀，保利達每股獲利1.8元，折合現價（1元）PE，喺1倍樓下，得0.5倍；而NAV增值到4.2元，折讓高達76%，平到笑。
雖則話，呢批物業銷售，要到2016及17年先反映，但保利達大股東九建（034），揸咗保利達73%權益，呢一點，對保利達會提早派息，就有好大憧憬。
同行中，德祥地產（199）五年升咗5倍，現價企近五年新高，但息率回報仍然高達7厘。睇番盤數，德祥地產由2012年度開始派高息，相信好大理由係，佢喺澳門物業預售好景，提早派息回饋大、小股東。保利達有同樣誘因及咁優厚條件，成為德祥地產翻版。
買保利達，中線博升1倍到兩蚊，PB得0.46倍，博升1.5倍到2.5元，PB仍然得0.59倍。
錢雋
細價股專家
本欄逢周二、五刊出