新兵到！轉會窗重開後，港甲各路大軍積極增兵，暫列聯賽第4嘅東方沙龍亦唔例外，更重金禮聘澳職墨爾本雄心前鋒戴蘭麥阿里士打（圖），噚日佢亦經已到埗。呢位31歲前澳洲國腳，曾外流挪威同冰島，雖然近季一直受傷患困擾，過去兩季為雄心上陣35場，僅入過4球同交出3助攻，今季更加未曾披甲；但佢1米93嘅身形依然煞食，正正係東方副總監歐偉倫心儀嘅衝刺型前鋒。呢位貴價兵今日就會立即隨隊操練，且看能否趕及周日對南區場聯賽。