呢個半月有間得8億幾市值、60年歷史香港老牌家族貿易行叫利記（637）嘅，係咁升。佢資產負債表係神級，資產有三樣，現金4億，向客戶應收嘅數有1.8億，最重要係商品zinc鋅存貨值5.7億，喺30日內全可變現金，負債則得1.4億。尋日收市賣1.07元，如果殼值4.5億，佢值1.76元一股。
每股應值1.76元
尋日我打畀老炒家傾，佢問：「利記呢排有乜消息？」我：「攞咗個全球得30幾間公司有嘅倫敦金屬所LME牌。就算有呢個牌嘅都係巨型礦企，佢又係大中華最大嘅鋅貿易行，但點解升咁多？」 老：「肥仔，唔話你年幼都唔得。攞呢個牌需時八個月，仲要通櫃咁俾LME驗。攞到牌首先等如啲資產有鬼佬查過係堅，多唔使講，有冇大陸公司攞到呢個牌？」我：「冇。」 老：「呢個殼唔係普通殼，你係國企要國際認可，收購利記即得，如果殼值4.5億，應該值1.76元一股。當年海通食大福證券用40億，而家利記加殼值14億，仲要你收購後賣晒啲存貨，個牌係免費，仲唔追？但呢幾日俾人掃，最重要係騰訊（700）入股華南城（1668）。」我：「係？」 老：「睇deal估騰訊現巨大到想天馬行空，想知製造業由礦產出土到成組件、製成每個工序，每一間廠點造點走，要呢啲行業內幕料數據所以入華南城。香港最強內幕料就係啲貿易行。上市兼有Q嘜就係利記，噚日升幅同華南城一樣。有牌有deal我即追，睇怕要追到1.76元。」
老炒家炒股炒到有十幾億身家，海嘯前1.52元大量入貨，即高過昨日收市1.07元。我即刻諗，你都肯買，肯定有料到。蟹貨喺1.52元，而家升四成，佢都唔沽啦！所以孫柏文建議不問價追利記！
提醒大家，上幾次跟足「不問價追」，毋懼建議日裂口高開幾成喺開市價買入，兼有跟我日後嘅落車指示至今全賺。不過一定要留意我facebook及專欄叫落車！
孫柏文
獨立股評人
http://facebook.com/shuen
本欄逢周二刊出