投資者炒一轉，唔需要太多理由，好似舊年只要祭出「科網」兩個字，無厘頭都可以爆升。海迪最近和一名分析員朋友講起呢個情況，佢就提出三個近年財經界最常誤用嘅字眼，海迪覺得都幾有意思。
第一個用詞係「物流」。你由A倉拖隻貨櫃去B倉，叫「物流」；上網買嘢送貨去你屋企那間順豐，又係叫「物流」，但兩盤生意的經營方法和前景，可以好唔同。據講有做開採購或貿易生意嘅公司，最近都想改稱自己係「搞物流」，好似換個名號，前途就突然會一片光明。
第二個經常被誤用嘅係「二、三線城市」。原本這只係內地粗略將城市分類的一套講法，但大家似乎就認定這對城市消費力的分級：二、三線？咁即係窮啲啦！其實，而家已經有大量二線城市，消費力同一線睇齊，甚至勁過一線。
最後一詞係「品牌」。LV、可樂每年億億聲咁掟廣告，就稱得上品牌。但在內地，模仿別人設計、改個英文名然後開舖，又可以叫品牌，再來上市向你抽水。這些似是而非的概念，大家在炒一轉時亦應當留意。
海迪