星期五行過彌敦道，一間商店嘅經理撲出嚟嗌住：「喂左先生，入嚟坐吓飲杯茶。」咦，冇嘢幫襯喎！點好意思阻人做生意？經理話：「哎吔，識你咁多年，過往你都有幫我買嘢㗎，可惜你人在中環，少啲過嚟尖沙嘴啫。」望吓舖頭，又好似冇人客噃，入去坐吓無妨。經理嘆曰：「我哋開舖四十年，以前專做美國人、日本人生意，唔知幾好，近十年啲美日豪客唔見晒，只靠一啲時時嚟香港公幹嘅商家，生意真係少咗好多。」點解唔轉型呀？彌敦道滿街都係內地人噃。經理話：「我五十年前在廣州讀完中學，逃亡來香港，嗰陣時我都算內地新移民，但已做慣咗美日客人生意，總係覺得同胞老套呢！」
哎吔，打開道門做生意，要見錢開眼嘛，但經理話佢唔識做一啲毛利率高到嚇死人嘅生意，見到錢都唔敢開眼。何謂毛利率高得嚇死人？經理話有一位新入行嘅年輕下屬A，嫌近來舖頭生意淡薄，佣金少，幾個月前轉行，多幾倍人工到銅鑼灣一間藥材舖做售貨員，藥房藥材舖係舊生意、新做法，每晚開業到凌晨一點，幾貴租都冇有怕。但下屬A最近竟然「好馬吃回頭草」，捨棄高薪回流，嫌錢腥乎？真係嫌錢腥㗎，下屬A對經理講：「我見到一啲來貨五十元以為可嗌價五百，點知老闆竟下令嘜價五千至一萬元，勢估唔到咁鬼貴仍然好賣得，自由行遊客竟一掃而空，老闆賺到笑，我做做吓，斬到同胞一頸血，於心不安，情願辭工不幹，返番嚟舊舖捱，樂得清靜，唔使日日講大話兼做到死。」
咁好賺，唔怪得最近見到一啲藥行在中環旺區出現，趕走財團連鎖店嘅分店。某日在中環余仁生老舖，見到有客人買保嬰丹，一買就兩打，余仁生啲成藥乜丸物丸竟然斷貨，架上無貨，店員話暫時斷市，等待工廠補單喎。中藥咁好賣，過往發夢都唔信，唔怪得一位親戚嘅親戚在藥行三十年，2013年初退休，大嘆賣藥30年，唔夠人哋做一年賺咁多。睇番啲遊客數字，2002年香港有內地遊客六百八十萬，03年有八百五十萬，04年正式全年有自由行，內地客劇增45%至一千二百二十四萬人次，到咗2012年就有三千四百九十萬人次，比2002年增加咗五倍，但同期香港零售面積（total retail space）大約增加咗1%咁大把，啲舖租有乜辦法唔狂升吖，一啲舖頭咪用盡方法大賺內地人錢囉。