范國威就前年立法會選舉經費超支34萬，違反《選舉（舞弊及非法行為）條例》而去高院申請豁免刑責件事，法官噚日終於頒佈判詞，話咖喱范對選舉女助理缺乏監管，仲寸佢有錢請兼職「告急」，都唔搵人幫輕個女仔，嚴重疏忽，但法官都相信佢唔係存心不良，批准佢七日內向選舉事務處更正資料。
咖喱范因為資源緊絀，自訂不得花費超過60萬呢個古怪規矩而鬧出大頭佛。鬆一口氣嘅佢同八方講，從來冇靠宣傳團隊好辛苦去爭取選票，所以對今次申請，只係有少少擔心。佢話其實就算超咗支，只要及時通知選舉事務處就冇問題，今次的確要負好大責任，受到教訓，選舉經費上限大概260萬，如果再參選，佢唔會再自訂咁低嘅經費上限。