【蒲友自白】
Boom酒吧老闆Ada曾是蒲友，一周蒲三晚及飲啤酒至天光，她形容翌日會胃部不適、頭暈、作嘔及返工「遊魂」，因擔心蒲得多影響健康，故每年也會做身體檢查。開店後為了客人健康着想，特設香茅茶等非酒精類飲品，當客人開始飲醉酒時，也會停止向他們賣酒。
Ada記得讀大學及初踏足社會工作時，經常與朋友夜蒲，有時一周蒲足三晚，每次會蒲到凌晨兩、三點甚至通宵，「對體力梗有影響，第二日頭暈、作嘔、無胃口，兼返工遊魂，因為周圍有二手煙，又飲酒，皮膚會差啲」。
開酒吧設非酒精飲品
她說，因擔心蒲得多傷身，及家人有長期病患，以往會每年做身體檢查。後來因工作關係及年紀漸長，體力未能應付密集式夜蒲，故減少夜蒲次數，最多每周蒲一次。現時作為酒吧老闆，為了給客人一些健康飲品選擇，會自製非酒精類飲品，如香茅茶及生果特飲，「客人會視乎心情，有時唔想飲酒就會點，唔限男女㗎」。
若有客人開始飲醉酒、有誇張行為或胡言亂語，會停止向該客人賣酒，「話啲酒未雪凍，或者賣晒。自己蒲過都知，飲到好醉係好辛苦嘅事，飲到high high哋係ok」。酒吧會有薯片及蝦條供客人送酒，但沒提供花生及果仁，因她個人經驗認為花生及果仁對胃部不太好。
《蘋果》記者