商務及經濟發展局前局長馬時亨早前話支持前財爺梁錦松選特首，肥馬噚日出席民主黨主席劉慧卿主持嘅網台節目時又再爆料，話阿松至今仲未正面回應有無意參選，皆因連第一關都未過到。第一關係乜嘢？咪係跳水王后老婆大人伏明霞嗰關囉。
唔知係咪俾狼英個地獄班底嚇怕呢，肥馬又指，普選特首嘅候選人，要有班子畀公眾過目先，就算唔「齊腳」，至少三司等重要職位，都埋班先好喎。
卿姐轉channel講普通話
前港區人大代表吳康民早排點名話卿姐可以選特首，噚日肥馬一見卿姐，就鬼鬼馬馬講聲恭喜，點知卿姐忽然轉channel講普通話，肥馬即刻笑佢，煲冬瓜咁靈光，係唔係為上京述職作準備呀。
點知卿姐好無奈咁反駁話：連回鄉證都冇，點述職呀？肥馬聽到，唔知會唔會叫老友阿松幫吓拖呢？