眨吓眼4年一度嘅世界盃就會喺今年6月喺巴西舉行，4年前南非世界盃，相信大家仲對西班牙捧盃、蘇亞雷斯古惑手球、林柏特遠射入晒白界無效等等場面記憶猶新，不過我求大俠對一位女子仲好念念不忘，佢就係巴拉圭乳神莉爾莎列基美（Larissa Riquelme），估唔到喺巴西世界盃前夕，佢宣佈將會做新娘，嫁畀發展平平嘅巴拉圭球員法布。
南非世盃「夾手機」成名
莉爾莎4年前遠道去南非支持巴拉圭國家隊，仲因為用豐滿嘅雙胸夾住手機，方便雙手為國家隊打氣，而被攝影師捕捉入鏡，美態獲得全球傳媒熱烈瘋傳。莉爾莎一戰成名後，由原本冇咩名氣嘅模特兒，搖身成為全球唔少「球迷」嘅力捧對象，佢亦都接拍過《Playboy》、《SOHO》等雜誌嘅裸照，仲接到唔少廣告，靠世界盃豬籠入水。
估唔到嘅係，現年29歲嘅莉爾莎似乎甘於歸向平淡，日前係個人Twitter就公佈將會嫁人，不但自晒幸福，上載佢同未來老公去巴黎、紐約遊樂嘅相，show埋鑽戒㖭，仲留言話：「每一天我哋都更相愛更開心，感激上帝畀咗到我哋咁多歡樂同庇佑。」不過佢就冇透露具體婚禮日子同安排，只係知道佢個未來老公都係足球員，就係生於阿根廷嘅巴拉圭籍球員法布。
未來老公現效河床
法布係乜水？相信我求大俠同好多資深球迷都唔知。原來剛滿32歲嘅法布，生於阿根廷布宜諾斯艾利斯，出身小阿根廷人青訓，司職進攻中場，曾踢過馬略卡、小保加等較大球會，但發展唔算好，11年轉投巴拉圭國內球會波特諾，叫做有番起色，拎到12年巴拉圭聯賽最佳球員，仲轉籍踢巴拉圭國家隊，喺世界盃外圍賽入過波㖭。法布效力波特諾期間，因利乘便同莉爾莎撻着，舊年佢就外借去阿甲嘅河床，但表現就一般，踢過兩場都冇波入，今次結婚唔知對佢足球事業有冇沖喜作用呢！
話時話，巴拉圭冇份踢今屆世界盃，莉爾莎會唔會再入場都未知，不過正所謂嫁雞隨雞，佢老公生於阿根廷，佢都有可能入場撐阿根廷，球迷不妨留意阿根廷嘅比賽，睇吓乳神又會唔會重出江湖。
