狼英諗咗當做咗，喺政綱白紙黑字寫低嘅降低強積金對沖比例同標準工時，全部喺施政報告失蹤，嫻姐帶頭喺立法會鬧爆狼英「唔夠英」，大家都以為佢嬲咗隻狼。但噚日狼英出席工聯會長者宴，就同嫻姐同枱笑笑口咬耳仔，火藥味忽然間煙消雲散。嫻姐事後同八方講，呢個場口畀狼英聽長者對施政報告意見，唔想轉移焦點，所以細細聲同佢講搵日坐低傾吓勞工嘢喎。前日羅范接受電視訪問，幫口話狼英肯研究就等於落實政綱，嫻姐激到彈起，即刻打畀羅范表示不滿，對方當然耍太極。嫻姐呻𠵱家同政府角力好辛苦，叫狼英唔好咁優柔寡斷。不過佢話低收入津貼總算有貨交，所以工聯會唔會用反對致謝動議呢招施壓喎。