股市跟紅頂白，一向係邊瓣當炒就搞邊瓣，好似近排手機遊戲股當炒，唔少公司都爭住擁抱手遊概念。好似AV Concept（595）噚日就無啦啦出通告話公司有隻新手遊《三國異誌》上架，當港交所（388）披露易係免費廣告平台，唔通呢個消息真係股價敏感資料？
舊年引入「紅籌之父」梁伯韜、阿里巴巴前高層衛哲等知名股東嘅AV Concept，好識捕捉市場走勢，舊年請韓國肥仔歌星PSY做產品代言人，又傳獲國產手機名牌小米入股（實屬流料）。呢排手遊股熱炒，博雅（434）、IGG（8002）按月升幅數以倍計，AV Concept唔執輸，又話有手遊概念。
仲記得2000年科網股熱炒時，不時有冧巴股話搞乜乜物物網。2006至2008年大炒資源概念，又有好多上市公司話買礦，𠵱家輪到手遊。金魚缸就係咁，大家都以為自己唔係最後接火棒嗰個。