濠賭科網彩票物流股齊齊發力，早前推介嘅海爾電器（1169）亦唔執輸，埋單炒高8%，成功破頂，有跟進嘅戰友，又可以坐定定放紙鳶。熱炒板塊方興未艾，不過戰友嫌煩都要講多次，消耗性上升總有完結的一天，現階段用注碼控制風險準沒錯。彩星玩具（869）捱沽後強力反彈，連帶同業德林（1126）亦搶高近8%，另一玩具股威發（765）僅升2%。一年計，彩星及德林分別升416%及80%，威發僅升24%，炒落後揀威發！
威發主要產銷奇趣精品及裝飾品、包裝產品和玩具，前兩者見紅，拖累中期業績蝕990萬銀，但玩具業務依然有錢賺。集團業績報告提到，包裝產品業務正進行連番整合，奇趣精品及裝飾品業務亦有改善迹象，全年要轉虧為盈難度不大。
值得留意的是，威發中期照派息1仙，手頭淨現金逾5,000萬銀明顯發揮正面作用。
威發另一賣點為細細粒容易炒，以上周五收市價1.04元，最新市值僅3億銀，僅僅等於殼價，主要股東持貨逾七成，即街貨1億銀唔夠，只要有資金垂青，要炒上易過借火。近期內房借港殼上市成風，威發業務簡單、持貨集中、財務狀況佳，絕對係一個靚殼，一旦被相中，又會炒到飛天。近期成交明顯增加，似有聰明錢儲貨，值得關注！
唐牛