夜蒲股Magnum（2080）最近實在熱爆，忍唔住要講多單八卦料，原來Magnum主席葉茂林係要向金利豐（1031）老闆娘朱李月華交租，唔知係咪因為呢個關係，金利豐有份做呢單刁嘅聯席牽頭經辦人呢？
Magnum𠵱家喺中環有三個夜場，其中喺荊威廣場嘅Magnum Club，據了解就係朱太私人有份嘅投資物業。根據招股書資料，呢個場嘅租約由2011年8月至明年8月，月租超過70萬元。
金融海嘯後，美林房地產基金喺2009年放售本地三個商場物業，其中一個就係荊威廣場，「玩具大王」蔡志明同朋友夾份以近16億元買晒，朱太有份投資，至於持股比例就要佢哋自己先知嘞，只知道單係荊威嘅作價就要5.4億元。既然係包租婆，Magnum上市，冇理由唔預金利豐一份嘅。