要講手機界紅人，非小米老闆雷軍莫屬。佢上周五獲國務院總理李克強邀請到中南海出席座談會，旁邊就係「股王」騰訊（700）老闆馬化騰。
雷軍喺會上當然有同李克強交流有關移動互聯網嘅發展，李克強仲打趣話「聽說小米已經變成了大米」。搞笑嘅係，雷軍竟伺機「抱怨」，話小米因為山寨手機好痛苦，又話市面上賣嘅小米手機有一半係假嘅，個別地方認為山寨手機創造經濟增長，搞到好難打擊，佢認為要加強市場監管，嚴打假冒偽劣商品。
聽完雷軍咁講，華華心裏面立即有個疑問，小米好似有「高規格平價版iPhone」或「國產平價iPhone」之稱，而雷軍本人都被人叫做「山寨版喬布斯」或「雷布斯」喎，爆紅了就投訴別人山寨？