今屆NBA常規賽最有價值球員（MVP）兩大熱門，一個係雷霆嘅杜蘭特（KD），另一個係爭取3連霸嘅熱火「大帝」勒邦占士。KD近排得分停不了，啱啱喺上周五贏勇士場波刷新個人得分新高54分，而同日大帝喺贏76人場波就只得21分，事後仲俾佢屋企人發短訊嚟揶揄佢。有啲刺激果然唔同啲，大帝喺上周六常規賽發威入34分，帶領熱火作客山貓加時贏104:96。
大帝喺上周五贏76人場波其實數據唔差，幾乎拎到「3雙」；佢喺對山貓場波賽前話：「我都好開心見到杜蘭特有咁好表現，對我嚟講係額外嘅推動力。我收到家人嘅短訊，講笑話杜蘭特拎到54分，我先得嗰21分，真係唔太掂喎。我估我都要做吓嘢，入多啲樽先得。」
摘34分加時贏波
大帝喺今場波頭威頭勢，頭5次射籃全部命中，不過之後都有啲起伏，一度連射9次不入，令熱火喺第2同3節一直落後。好在大帝喺第4節回勇，逼至打加時。熱火喺加時入嗰14分裏面，有6分係由大帝貢獻，結果佢全場拎到34分、8個籃板同埋6次助攻，連續15次同山貓交手全部贏晒。
被爆白宮內「抄牌」
場內回勇，大帝喺場外就有不利傳聞，話說熱火大軍喺上星期探訪白宮，同美國總統奧巴馬見面𠴱陣，在場一位電視製片商上載相片到instagram之餘，又爆料話大帝向一位女仔「抄牌」拎電話號碼，仲講到好嚴重咁提醒大帝佢啱啱先喺上年結婚。可能拎電話都係傾吓偈交個朋友啫，又唔使咁緊張嘅！