呢日聽完泰國Chira教授嘅演講，本想與佢討論泰國民主問題，但佢遠道而來，主要係促進泰港商貿關係與服務業合作嘅商機，香港嘅工貿署署長麥靖宇及泰國總領事亦在場，諗住無謂同教授爭論吖，以免泰國總領事尷尬。左丁山留意到本港報章對泰國民主黨佔領、封鎖曼谷新聞報導得最大最多篇幅嘅就係大公報、文匯報。其中有微言大義㗎，因為（一）封鎖曼谷令外來遊客視曼谷為畏途，酒店餐飲零售業蒙受極大損失，打擊泰國經濟，左報希望用此新聞令香港人聯想到佔中可能發生嘅後果；（二）泰國民主黨及曼谷精英、示威人士係要求取消一人一票普選喎，改用各界代表組成人民議會選首相及政府喎，北京最啱聽，藉此香港政改諮詢時刻，左報仲唔乘機利用機會做大單新聞咩。中央政策組王卓祺博士都寫咗一篇「民主激情」，從泰國民主講開去啦。
再講多一次，泰國民主問題不在於一人一票選舉，要害係政府上下皆貪，司法執法機構亦飽受貪腐侵蝕，沒有獨立正直嘅司法系統，民主制度就係建築在浮沙上。假若香港有一日發現法庭竟有類似情況，香港就玩完。
Chira教授演講時，指香港對外貿易做得好醒，但從不向外推廣香港服務業之優勢，比較令人奇怪，佢係人力資源研究專家，四十年來不斷研究、傳授人力經濟學，佢話在亞洲地區中，據佢嘅研究，香港有三樣嘢係世界級水平，即是（一）技術及職業訓練，香港職業訓練局（VTC）成效卓著；（二）反貪污，ICAC絕對值得亞細安（ASEAN）國家學習；（三）財務金融管理。教授希望香港有關機構或人士能組織顧問隊伍，到曼谷開班，俾GMS地區嘅官僚與企業上課學習，藉此拉近香港與亞細安、GMS嘅商貿關係。左丁山從未聽過外國人稱讚香港職業訓練/教育嘅，哦，原來在外人眼中，香港有三寶，我地竟然唔多顧及。睇番今年特首施政報告，似係扶貧報告，但對教育着墨甚多，由90至117段共28段講到培育下一代，算係咁啦。教育局吳局長對左丁山講，VTC係外人稱讚多過香港人讚好嘅機構，過往培訓成效顯著，以後幾年，政府會加強支援職業教育喎。