仲有兩個星期就過年，政黨、政團趁歲晚四出寫揮春、派利是封，順道向街坊講吓普選有幾重要，好似公民黨黨魁梁家傑早幾日去鑽石山寫揮春，噚日就轉戰銅鑼灣，傑哥邊寫邊同街坊講爭普選，不過唔少人緊張利是封多過政改，猛追問傑哥仲有冇得派。
另一邊廂，黨主席余若薇（Audrey）就喺太古揮筆，八方都攞埋一份，Audrey話𠵱家新聞自由被收窄，一單接一單，佢就寫咗「撐記者」、「新聞自由」揮春為新聞界打打氣。
維園年宵25號開鑼，一入去就見到嘅支聯會攤檔，繼續有華叔揮春同書法瓷杯賣，為咗令大家更了解六四真相，又製作內有六四資料嘅6.4GB記憶棒，至於上年熱賣嘅《民主會戰勝歸來》專輯仲有4,000張，有買趁手喇。
一向吸金力極強嘅學民仔，年宵推出「From The Masses」短袖tee，想帶出「從群眾中來，到群眾中去」訊息。至於去年大玩庸官「魚蝦蟹」嘅民主黨，今年繼續以狙擊特首梁振英作招徠，負責年宵攤位嘅創意媒體部部長黎敬瑋只肯透露係一樣實用嘅家居品，神神秘秘只因批貨喺內地訂造，仲未安全抵港，怕「見光死」，俾人截咗就血本無歸喇。
公民黨今年就出賣兩位最高領導梁家傑同余若薇……嘅書法，有傑哥出品嘅「我是一個公民袋」同Audrey「認真就輸了」、「不在沉默中爆發 就在沉默中滅亡」tote bag，售價分別係98元同108元。
工黨folder有明哥簽名
工黨何秀蘭透露今年年宵賣以「香港顏色」為主題folder，一款係去年萬人撐傘出席六四集會、第二款係同志遊行時嘅彩虹旗。為咗帶畀大家驚喜，仲搵大愛同盟嘅黃耀明（明哥）同何韻詩限量親筆簽名，每晚推出，年三十晚數量就較多。
李八方
mailto:[email protected]
泛民新年精品
■公民黨「馬上普選」玩具
■公民黨書法公民袋
■和平佔中利是封
■學民思潮口號tee
