噚日周潤發、甄子丹、郭富城、陳喬恩、張梓琳同何潤東喺北京出席電影《西遊記之大鬧天宮》首映，喺戲入面扮演玉皇大帝嘅發哥氣勢十足，佢喺台上爆料投訴甄子丹脾氣差，發哥話：「希望子丹拍完這部戲，脾氣慢慢能下來。」
自從拍完《葉問》後身價今時唔同往日嘅子丹，聽到發哥嘅教訓，佢亦句句有骨話：「發哥這麼貴，他的鏡很珍貴，拍起來要格外注意，尤其發嫂就在旁邊，不僅要現場工作人員配合不能出錯，發哥走出來的樣子還要帥！」在旁嘅城城即刻打圓場話：「子丹是對他自己發脾氣，很少對演員發。」
城城撼牛角
事後馮仁昭打電話畀發哥，問怕唔怕子丹嬲？見慣風浪嘅發哥話：「唔怕，我係講事實，佢又要做武術指導，又要黐毛扮孫悟空好辛苦，難免心火盛。」而子丹坦言呢套戲有夢幻陣容演出，令佢壓力好大，扮演牛魔王嘅城城就話起初唔習慣，經常撼到自己嘅牛角。
撰文：馮仁昭
