聖誕過後商家磨拳擦掌，迎接農曆年掃貨的強國客，部份大叔踎在名店外抽煙吐痰，令人側目，再有錢就買遊艇，買一比一的鐵達尼，同樣令大家O晒嘴，而最爆的可算是買《紐約時報》被拒，轉而收購《華爾街日報》的陳光標，前排仲話買唔到《紐時》，做控股股東都得，若咁都做唔到，就單純入股，舉止真係嚇親人。若論本港上市的強國「購物狂」，又點可唔提復星國際（656）。
復星近排發通告近乎是「刁」駁「刁」，去年先後收購連鎖渡假村Club Med、入股意國頂級男裝製造商Caruso，最新入標競投《福布斯》等，瓣數雜且多，與陳光標唔同的是福布斯家族確實有賣盤意圖。剛踏入2014年復星逾百億收購葡萄牙最大保險公司CSS八成股權，正當大家憂慮呢間市值逾500億的公司，咁買嘢法遲早買到窮之際，復國上周發盈喜！
受惠於產業營運板塊利潤穩定增長，加埋保險業務發展迅速，復星全年純利顯着增長，中期盈利16.9億人仔，僅增長9.1%，今次盈喜即代表下半年增長引擎正加快，更重要是全城期待，復星與阿里巴巴合資搞的「菜鳥網絡」近日開始拿地，應有更亮麗前景，復星在好消息下突破三個月橫行區，上周指數與個股走勢詭異，唔想chok到嘔兼放長線釣大魚可吼復星。
Samantha
本欄逢周一、三、五刊出