【二次創作】網友真係創意無限，竟然將謝霆鋒舊歌《活着Viva》惡搞二次創作，改咗歌名做《活佛Viva》，歌詞仲好鬼抵死：「年輕得剃度誰亦能像波惹般乾脆，快活到半日也像活佛一百萬歲」，噚日連YouTube都有歌聽㖭。
網友將周星馳同劉以達「夢遺大師」嘅《食神》片段、葉子楣喺《富貴開心鬼》俾和尚兜巴星嘅片段剪接成MV，笑到噴飯。
漏奶唱到冇音功
不過，主唱嗰位「漏奶」就冇音功囉，網友留言勁彈「好難聽」，仲有網友話聽錯咗做「年輕得剃度誰亦能像×嘢般乾脆」，真係笑死人！連前新聞主播柳俊江都留言話：「半夜畀個活佛Viva笑到醒晒。」網友仲起哄叫傳11月開騷嘅霆鋒，喺演唱會唱呢首㖭！另外，陳奕迅《今天只做一件事》亦被惡搞變《今天只念一次經》、Beyond《情人》變《僧人》、關心妍《愛是不保留》變《老衲不保留》等，網友改碟名做《罪與罰》兼設計埋唱片封套，仲黐上HMV售$110嘅貼紙，以假亂真。
場主：守庫
