上周六西甲聯賽，皇家馬德里由新鮮出爐金球獎得主基斯坦奴朗拿度（C朗）領軍下，作客出戰包尾嘅貝迪斯，結果人人有波入齊齊開心，以5:0大勝對手。呢場波亦係主帥安察洛堤教練生涯歷來第500場勝仗，入5粒賀500W，夠晒應景。
C朗喺上星期大熱贏得國際足協金球獎，之後乘勢連續兩場波都有波入。佢先喺上周三西班牙盃建功幫皇馬贏奧沙辛拿，到上周六場西甲又再先開紀錄，開波10分鐘一記禁區外勁射死角破網，貝迪斯門將史堤芬安達臣企定定睇住入；據講呢個超級炮彈射球時速高達132公里。之後皇馬先後由加里夫巴利、賓施馬、迪馬利亞同艾華路莫拉達各入一球，最終以5:0大勝對手，繼續力追巴塞隆拿同馬德里體育會。
執教生涯平步青雲
92年安察洛堤喺AC米蘭掛靴之後，95年喺小球會雷焦安納展開教練生涯，之後平步青雲教過唔少大球會，包括帕爾馬、祖雲達斯、AC米蘭、車路士同巴黎聖日耳門，贏過兩次歐聯，又贏過意甲、英超同法甲冠軍，不知不覺到今場波原來係佢執教以嚟嘅第500場勝仗。佢喺賽後亦好滿意皇馬球員嘅表現：「成隊波喺今仗都踢得好醒神，由開波到完場都咁集中。咁早入波亦令到我哋有更多空間做快速反擊，除咗入波嘅球員之外，一班中場表現都好好，尤其係莫迪歷。防守方面一樣咁出色，所有細節都做得好好。」
賓施馬錄得皇馬100球
加里夫巴利都冇畀C朗威晒，佢喺今場入咗球自由球，難得嘅係巴利喺今季西甲主射罰球嘅機會唔多，但至今已經入咗兩球。另外，喺09年加盟皇馬嘅法國前鋒賓施馬，今仗又入1球之後，已經喺皇馬累積到第100個入球。