【專 訪】
鷹君集團創辦人羅鷹石孫女羅寶文，去年底擢升為富豪系幾間公司的副主席，未夠35歲便參與掌管過百億元上市王國。高質港女做單身貴族，注定惹「眼角高」指責。信佛的羅寶文懶理這種誤會，並坦言只要遇上對的人，就一定會主動出擊，「如果有鍾意嘅人，唔去把握就對唔住自己」。
今年將踏入35歲的羅寶文生於富貴之家，且自小資優，19歲便提前大學畢業，其後一直協助父親打理家族生意，身邊雖然一直不乏追求者，至今卻仍是單身。她坦言外界指自己「要求高」是個美麗誤會，「人對感情其實唔係咁理性，好多嘢真係靠感覺」。
眼角高屬美麗誤會
電影《一代宗師》裏，宮二對葉問說：「世間所有的相遇，都是久別重逢」，道出人間緣份的微妙。受佛教思想啟發，羅寶文亦相信緣份，「有啲人你見到佢，就好似似曾相識，有重遇嘅感覺。呢啲絕對唔係話你去衡量一個人嘅條件呀，要求乜嘢乜嘢，咁人揀你，你揀人。」事業女性做事精明，對愛情的無奈，她一語點出：「你做嘢可以有個business plan知今年做乜，但緣份嘅嘢……」
她在大學修讀心理學，感情觸覺自然敏銳，回想起自己的追求者時，「好難唔知道人哋追緊你，但我唔鍾意去嘥人時間，有啲寧願做朋友，我都會好清晰咁，唔想有誤會」，更笑言現時的男生非常直接，「而家嘅男仔好得意，好快下……我會覺得，有時只係見過一兩次，使唔使咁澎湃呢？」
她又笑指，現今男生不再含蓄，與上一代的追女手法截然不同，「我自己可能比較傳統啲，覺得好得意呀而家嘅新一代嘅表達。佢哋對愛情觀，容易許下承諾嘅程度好快，飯都未食過已經山盟海誓，好搞笑。但我又深信，佢講嘅一刻唔係呃你……就係嗰一刻，哈哈。」
「錯過咗就返唔到轉頭」
羅寶文直言，只要遇上喜歡的人，便會主動出擊，「我覺得而家無分男女喇，同埋如果鍾意嘅人，唔去把握就對唔住自己，我覺得做人最緊要無悔，做嘢對得住自己，對得住人哋。如果有一個好好嘅，唔去珍惜，到咗十年後，你會發覺有啲嘢錯過咗就返唔到轉頭。」
羅寶文「極少」出去玩，幾乎滴酒不沾，從不到蘭桂坊夜蒲，放工生活就是回家湊狗仔、陪家人，慶幸自己皮膚仍然年輕，「覺得係飲多啲水啦，同埋我本身食素。」
記者：馮健鏗 鄧偉忠