新年前後，唔少企業都會喺酒店或大型酒樓租場舉行周年晚宴，等公司員工高興吓，據聞中資企業今年就冇呢支歌仔唱，事關中央大力打擊公款消費，國資委舊年底向中資企業下令，唔准舉行周年晚宴，訂咗場都要退場咁話。
有中資投行賓架透露，國資委舊年底下令，要求所有同事喺舊年12月都唔可以開單請人食飯，免得同事趁聖誕、新年利用公款宴客，大吃大喝，呢項指令本月繼續生效。此外，呢間投行原本每年年初都會喺金鐘某間五星級酒店筵開超過十圍舉行周年晚宴，今年亦已經取消。據聞，國企與央企都收到類似指令。
其實，國家主席習近平前年底推出「八項規定」，嚴打公款吃喝同奢侈消費以來，唔少高檔食肆、名貴煙酒銷售商都首當其衝，睇情況，中央係要求大家繼續慳得就慳，冇乜放鬆之意喎。