周中直播場波真係好悶，雖然球星雲集。呢場名為金球獎嘅波，其實係唔需要睇直播嘅，遲一日半日先知邊個係足球先生有乜嘢大不了吖，加上事先張揚估都估到係葡萄牙人攞㗎啦，結果喺梳化瞓着咗幾次，先等到「冇爆冷」嘅賽果。見到基斯坦奴朗拿度（C朗）個樣，諗住可以去瞓啦；又唔係喎，乜有個bb仔一齊行上台嘅？咁就值得睇多陣喎！
係，我好鍾意睇bb，尤其係嗰啲喺大男人、麻甩佬隔籬嘅bb。就算班球員平時幾勇悍癲狂，只要將佢個bb放喺隔籬，你就即刻可以睇到硬漢嘅另一面。
C朗呢次真係贏晒嘞，獎就拎咗，然後畀埋個仔上台，呢位兩歲豆丁一上台就賣萌，搞呢樣搞嗰樣，越搞得多越點醒大家，原來C朗已經係老竇一名，再加埋索爆女友喺台下默默支持，「family man」形象出晒，蒲友、貪玩精個底洗乾淨晒；再加埋C朗難得一見嘅男兒淚；呢個頒獎禮唔係睇足球先生嘅誕生咁簡單，直頭係見證咗一位浪子回頭告解完再洗禮嘅reborn過程，禮成！
其實唔經唔覺，C朗條路真係抄足碧咸叔叔，𠵱家碧咸出席大大小小各項活動，身邊總有一兩件化骨龍傍身，正所謂「玩女不如湊女，泡妞不如騎牛牛」，入屋指數高好多，一家大細都受落；爸爸放心，媽媽開心，得咗。
湊仔呢招原本美斯都有得出賣，可能佢明知今年冇機會上台坐正，就唔好嘥咗粒彈藥啦，因為bb仔呢張「王牌」，梗係有需要先出啦；好似季初蘇亞雷斯喺谷底沉吓沉吓嘅時候，佢喺觀眾席抱住個初生bb嘅慈父樣，真係可以減番些少殺手味道㗎。
另一個爸爸形象加晒分嘅，就係寸嘴摩連奴。好多年前，佢年少得志、把口臭到不得了之時，全靠佢喺車仔捧起英超獎盃時帶晒一家大細落草場合家歡野餐咁款，令到愛佢嘅更愛，嬲佢嘅嬲唔落；一家之主嘅慈父樣，話畀大家知佢做一隊之主都可以好warm。到今時今日，佢頭髮逐漸變唔黑，把口一樣咁臭但少咗開口之時，竟然喺上一場大戰唔知作客邊隊嗰陣，當球隊入波時衝咗去觀眾席度攬一攬個仔，嘩，呢招通常喺澳網先見到費達拿贏波咁做㗎啫。
要喺球場洗底，小朋友真係好過女朋友！
KEYMAN
now TV主持