獅子山學會嘅皮蛋王早前去印度新德里開會，在國際會議發言，特別帶埋女同事去，等佢增加國際經驗，行前兩人訂酒店房，皮蛋王住在酒店開會場地之上嘅房間，女同事住在另外一間酒店，同一條街，相距約一百米，大概等同廣東道香港酒店與馬哥孛羅酒店嘅距離。但主辦單位強烈建議皮蛋王兩人同住一間酒店，費事發生安全問題喎，皮蛋王起初覺得對方過慮，但人哋係當地人，熟悉當地環境，既然人哋關注到女士行路一百米嘅安全性，咪聽吓話囉。
開會回來不久，得知一位丹麥女遊客一個人在街頭向兩位男子問路，就被帶到偏僻地方，call齊五六個人嚟輪姦呢位丹麥女遊客，為人傷痛之餘，皮蛋王亦慶幸自己兩位平安回來，未有意外。但奉勸各位女士，到印度旅行千萬要瞻前顧後，十分小心至得。
講到旅行，肥仔K呢個星期本來應邀去曼谷參加同學婚禮，但曼谷局勢混亂，黃衫軍（泛指反他信英祿人士）在素貼組織下，聲聲圍城，又有激進學生組織聲言佔領曼谷機場指揮塔，如果亂搞，曼谷對外空運隨時停頓，肥仔K與其他同學卒之取消了曼谷之行，事實上在如此環境下，泰國人在市中心酒店舉行婚禮，亦會受到交通影響，嘉賓難以到達。
上星期三，泰國著名經濟及人力資源教授Chira博士乘出席亞洲金融論壇之便，受陳智思邀請，在香港會與泰國香港商業議會會員吃午飯，講香港與亞洲區國家，特別係GMS如何拓展商貿關係。佢以為個個都識何謂GMS，偏偏左丁山不知是乜東東，好彩有手機便可上網，佢一路講，左丁山一路睇手機，知道GMS即是Greater Mekong Subregions（大湄公河地區），係由亞洲開發銀行推動發展嘅一個項目，此地區包括湄公河流域地區，即中國雲南、越南、寮國、柬埔寨、泰國及緬甸。北部中國、南部泰國可以合力帶動整個GMS嘅經濟商貿發展。講完梗有人問及泰國局勢啦，原來Chira教授說是曼谷精英，對他信英祿兄妹政權之貪腐非常討厭，思想上係黃衫軍一類，但四十年前佢係年輕教授之時，亦曾與學生一齊爭取上街民主選舉，今天選擇反對民選政府及民主選舉，其思路歷程，十分痛苦。