【記者潘柏林報道】大角嘴有一間講究禮貌的餐廳，食客只要落單或埋單時向侍應講一聲「唔該」，每個飯餐即減5元，折扣後一份吉列豬扒飯只需25元。餐廳負責人張家濠（Ken）表示，港人生活壓力大，禮貌程度遠遜外國，而內地遊客更普遍沒有說多謝的文化，希望優惠計劃令餐廳氣氛更佳，營造開心工作環境，減少侍應因為受氣而辭職。
大角嘴道61號的「豬扒之家」周二推出有禮對待服務員計劃，老闆阿Ken指熟客普遍歡迎優惠，但有生客對講「唔該」感到尷尬，「佢哋覺得特登講唔該好似想賺你嗰5蚊！」Ken認為優惠有助推廣禮貌文化，「內地人冇唔該呢樣嘢，叫嘢就會『喂』，或者大大聲同你講，但可能佢內心唔係冇禮貌嘅」。
冀減少員工受氣
Ken亦希望計劃減少員工受氣，他坦言最低工資實施後，不同餐廳提供的薪酬相差無幾，僱員會選擇更舒服的工作環境，「佢哋返工時間多過喺屋企，如果返工開心啲，會做得長啲」。侍應兼收銀員黃小姐工作一年多，她坦言工作難免遇上惡客，通常向同事訴苦後便會忘記。她指推出優惠後多了顧客講「唔該」，「大家見到會笑一笑」。食肆供應的飯餐大部份由30元至50元，扣減5元，等同減價10%至17%。
顧客周小姐稱平日都會講「唔該」，但遇上無禮侍應便不會以禮相待，「有禮貌就會講唔該，如果佢求其放低（食物）就唔會」。陳先生指香港越多越多低頭族，用膳離不開手機自然不理身邊的侍應，他亦關注訪港遊客越來越多，逼爆食肆令服務質素下降，「侍應多嘢做一定冇咁客氣」。上海遊客樂女士首次來港，她讚揚港人較內地人客氣，但認為即使遇上無禮的人，自己都應該保持基本禮貌。
經營多間日式及中式食肆的叙福樓集團執行董事黃傑龍指，部份客人脾氣確比較暴躁，「有時排隊排得耐，甚至會用粗口問候員工」，他讚揚食肆使用有關招數頗見心思，「啲客禮貌啲，員工做嘢都會開心啲」。飲食業職工總會秘書長黃必文則表示，部份食肆人手不足，待慢了客人，前線員工因而成為客人出氣袋，他認為要令員工工作開心，除了要提供足夠人手，也要給予合理待遇，直指少收5元的措施作用不大，「你不如將嗰5蚊加畀員工好過啦」。