大殼台近年流失率極高，就算被視為親生仔女嘅藝人，都紛紛離巢外闖搵食。當中有之前被高層「數字人」錫到燶嘅「向海」，都唔會續約。
大鄉里出城
講開向海，又諗起佢出道時候嘅一個笑話，話說佢喺初出道時，仲係好純好pure嘅內地人，有一次公司安排佢上內地做活動宣傳，約咗一班記者同佢喺已經摺咗嘅理想酒店出車。到咗指定時間，大殼台嘅公關都唔見向海，就打電話畀佢啦，向海喺電話好理直氣壯咁話：「我咪喺酒店大堂等囉，你哋喺邊呀？」嚇到公關急急腳拉番佢出嚟。理想酒店係時租偷情酒店，係香港人都知，偏偏向海就真係唔知。
撰文：關仁