【隔牆對論】
記：《蘋果》記者 鍾：立法會資訊科技及廣播事務委員、民建聯鍾樹根
聲言原則上支持港台建新大樓的民建聯，早前在立法會工務小組會議上指摘新大樓建築費超支，即使政府極力游說仍投下反對票，令撥款申請未獲工務小組通過。
記：民建聯曾支持超支幅度驚人的高鐵項目，為何當時不反對？
鍾：當時我不是立法會議員。但我做了議員後，都發覺這兩年工程超標得「好犀利」，例如西九，我們都毫不留情地道出其超標問題所在。我覺得除物價飆升外，政府都沒做好控制，沒想好方法去應付建築原料或者工人（工資）飆升，以為每次超支後上立法會，講兩講就會有（錢畀）佢。「你從呢個西九戲曲中心、M+，我哋都畀咗好大壓力政府，令到佢哋可以減少開支。所以就唔存在邊個機構、邊個部門上嚟就放，邊個上嚟就唔放。至今呢年幾我哋都係一個咁嘅宗旨去做」。
記：民建聯是否因為政治理由，例如港台節目過於批判建制派才反對撥款？
鍾：「唔係呀，港台對我哋都幾好，比較你哋《蘋果日報》佢哋都算係好溫和」。我喜歡聽晨早節目，由八十年代、九十年代聽到今天，我覺得他們都做得好持平。「我係港台擁躉嚟嘅，我哋一路都係聽港台大、睇港台啲節目，啲節目ok㗎，唔通《獅子山下》又政治問題咩？」我沒對港台的節目不滿，「《頭條新聞》都冇乜嘢所謂，如果講俾人挖苦、俾人嘲笑，我諗《蘋果》嘲笑仲多過港台好多啦」。
記：會否覺得這次政府的游說工作不夠賣力？
鍾：這幾年我認為（政府）每次都似擠牙膏。不單止港台，其他事情也一樣，「你『拮』多佢兩『拮』又會畀多啲資料你，畀咗資料你，你問多佢兩問又唔答」。今次港台的回答，或許是他們可能答得不好，或者他們基本上沒一個全盤計劃，就弄出一個這麼大的工程。
你當啲議員甚麼都不懂也好，你要慢慢向議員解釋。「我做IT（資訊科技）咁耐，做咗IT卅幾年，你隊一堆名詞畀我，拋唔到我㗎！舉個例，錄音室，𠵱家已經數碼年代，有冇必要保留模擬制式嘅電台呢？如果有，咁肯定都唔需要保留𠵱家五條頻道咁多，你都盡量叫人買數碼收音機，將來都冇人用膽機㗎啦，咁冇人聽模擬，你係咪仲需要五個台呢？」
「再舉個例，嗰啲重複嘅設施，譬如消防、供電等，佢又用一個名詞話：人哋係咁㗎啦、國際係咁㗎啦。我唔覺得係咁，你諗吓火警時，你隔籬屋企有兩個消防系統都冇用㗎啦，你都係走頭、熄機走人，你整兩個系統做咩？」
記：你認為新大樓的計劃裏，有哪些地方是可以縮減的？
鍾：電台是否需要這麼多錄音室？如果不需要，可以縮。儲存方面，以前拍了這麼多片，是否需要存膠卷、菲林呢？
「佢都話所有都會數碼化，擺落隻（硬）碟度，咁唔需要自己整一個電影資料館出嚟」。他們又說要好多data flow（資訊流）、好多資料轉來轉去，「咁有幾多data flow呢？如果嗰啲係唔用就擺喺人哋嗰度，用就唔係擺喺人哋嗰度，我唔係話你一個data centre都唔搞，你搞個小型嘅，專係畀你經常用嘅嘢就擺喺度。你話搬去第二度係咪一定要用data呢？如果既然你都唔用，你咪抄喺隻碟度，叫個messenger拎住個篋，好似匯豐銀行都係咁，搭埋的士都係100蚊之嘛。如果呢啲都唔整，佢起碼慳兩層」。
記：當局要做甚麼才能取得民建聯的支持呢？
鍾：他們應該有一個完整計劃，將未來發展，起碼未來五年、十年會如何計劃，因為這個計劃要用那些設備，而這些設備為何要興建，為何不可代替，「要話畀我哋聽，咁我哋衡量過佢真係有咁嘅價值、有咁嘅需要嘅時候，我哋點解唔畀佢啫？但係你唔可以整咗一啲嘢，根本你自己都冇諗過做唔做，不過要住先，我都唔知用唔用㗎將來，總之攞住先啦。咁到時唔用咁點？𠵱家唔係浪費一、二百萬、一千幾百萬嘅問題，𠵱家係浪費幾十億嘅問題！」
mailto:[email protected]