「等欣賞你被某君，一刀插入你心……」李蕙敏唱《你沒有好結果》，一刀插正樂迷心，歌曲大受歡迎。但她入行以來，由有唱片公司幫出碟、到後來自資出碟，幾經風波。2003年遇人生低潮，事業、愛情、家庭皆失意，憑樂觀性格走出困局。一個女強人的心態，一人撐起半邊天，今日已為人妻，女強人都軟化，她說：「心靈上有依靠，唔再係單打獨鬥。」
撰文：王連連
李蕙敏由80年代尾與區海倫合組Echo闖樂壇做歌手，後來拆夥單飛發展、97年曾打算在紅館舉行個唱，因政府收回檔期舉行回歸騷而告吹。後來加入寶麗金，她是該時間公司內年資最高的女歌手，曾被喻為寶麗金一姐。其後曾自資出碟，2002年更簽約梅艷芳成立的唱片公司Mui Music，未出碟梅姐卻離世，多年來在娛樂圈繼續憑自己之力飄泊。
入行多年推出過不少唱片的李蕙敏，遇到黃偉文填詞的幾首歌《你沒有好結果》、《活得比你好》，當中帶有報復意味的歌詞，配合她獨特的「沙沙哋」聲線，唱悲情歌曲大紅，唱到街知巷聞。只是歌比人更紅。但她都未言敗，兼且向多方面發展，創立自己的服裝設計生意等，去年與外籍老公結婚後，並沒打算安定下來做少奶奶，更決定今年4月開演唱會。
拒絕少奶奶生活
李蕙敏有着前輩歌手的風範，獨立也有主見，出外工作宣傳，不像年輕歌手左右夾着工作人員幫手。婚後的她仍堅持工作，她說：「做嘢都可以好幸福，唔做嘢自己唔習慣。」步入人生另一階段，李蕙敏選擇這個時候舉行自己的演唱會，她說：「今次主題係Eternal Love，嗰種愛有雙重意思，有自己人生新階段之外，都想多謝咁多年來支持自己嘅歌迷，佢哋等咗好耐。」不過唱的歌已不再是歇斯底里地要舊情人有多折墮，她說：「會感情啲，唔係呼天搶地，講心路歷程。仲有快歌，會開心啲有正能量。」
說着人生起落，李蕙敏聲調冷靜似在說別人的故事：「我成日為做好件事瞓唔到、焦慮，太沉重嘅工作量，每日都會好擔心。最唔開心係03年，嗰年爸爸走咗，佢走咗係我幾大嘅一個打擊，佢係我最愛錫嘅人。加上工作唔順利，寶麗金後來變環球，轉人事就會轉作風，好纏擾，最後離開咗公司。喺Mui Music 03年梅姐走，而且哥哥張國榮又離世，個心好氣餒，嗰年全香港士氣都差，又有沙士……人總會諗，冇咗呢樣都有其他嘢安慰吓，點知一浪接一浪，連感情都唔好，同嗰時嘅男朋友分手……好辛苦嘅過程，情緒好差，後來放慢咗，開通咗思想，參考好多心理學書，開始開解自己。」
廣閱心理書自救
面對無止境的負面情緒，幸好李蕙敏能自救走出困局，她說：「遇到乜都好，冇人幫到自己，情緒低落自己行返出嚟，盡量自己幫自己……由細到大都係自己面對，家人唔會同我傾偈開解，自己面對，總要企番起身。」當低落時，李蕙敏看心理學書又畫畫，她謂：「畀個break自己，做啲自己想做嘅嘢抒發自己情緒，畫畫時我好集中，唔諗其他。」李蕙敏亦慶幸有朋友相助，所以特別珍惜友情，她說：「屋企人年紀同我較差得遠，至少相差10年，好多時都係同朋友一齊過，所以朋友好重要，我會識珍惜。人哋唔一定要錫你，尤其係朋友。家人就可能無條件，但朋友唔係應份。」而現在成為人妻，會否不再是女強人擁着獨立思想？她說：「冇乜大改動，同之前差唔多，但覺得有個伴。有心靈上依靠，有如有一個team，唔再係單打獨鬥，可以share分享感受。我都有小鳥依人一面，唔工作都係一個小女人，學到乜菜式都會煮。」
髮型：Roy Yung（Salon Nova）
場地：Le Grand Pokka Cafe