嚟緊周日英超上演「藍紅」大戰，由「藍戰士」車路士主場對「紅魔鬼」曼聯。曼聯今季面對強隊輸多贏少，車仔眾將似乎胸有成竹，周四仲拉大隊睇NBA，結果同屬俄羅斯班主嘅網隊就大炒鷹隊，對於由俄羅斯油王阿巴莫域治擁有嘅車仔，睇嚟係好兆頭喎。
俄羅斯班主揚威倫敦
周四呢場NBA常規賽戲碼唔算好強，不過舉行地點喺倫敦O2體育館，所以都吸引唔少英超球星觀戰。有「主場之利」嘅車路士同阿仙奴就有較多球星列席，車仔有大衛雷斯、夏薩特、舒賀爾尼同雲堅基爾4子約埋一齊睇波；巴西國腳大衛雷斯仲好high，對住鏡頭伸晒脷。兵工廠就有普多斯基、梅迪薩卡、韋舒亞等球員，曼聯兵都有捧場，搵勻成個O2，見到里奧費迪南、贊奴沙，仲有葡萄牙翼鋒拿尼，但佢因傷缺陣藍紅大戰。
講番場比賽都幾一面倒，網隊憑射手祖莊遜攻入29分，以127:110大勝，連埋之前兩次喺倫敦比賽3戰全勝，不如佢哋考慮吓將主場由布魯克林搬去倫敦啦。
網隊同車路士一隊打籃球，一隊踢足球，原本風馬牛不相及，不過佢哋都有共通點，就係班主都係俄羅斯富豪。網隊班主普克豪洛夫唔算熱情，今次到倫敦觀戰，都只係喺季初睇咗一輪比賽後，再次親身睇波。賽後佢就大讚球隊士氣好，就算季初脫腳，對拎總冠軍仲好樂觀。車仔班主就係大家熟識嘅阿巴莫域治，成日喺史丹福橋球場見佢一家大細睇波，唔知星期日又係唔係俄羅斯班主揚威倫敦呢？
尹佩斯朗尼無緣鬥車
講番車仔對手曼聯，佢哋呢排戰績浮浮沉沉，上季神射手尹佩斯又養緊傷，仲盛傳佢唔妥領隊莫耶斯。不過呢位荷蘭前鋒周四都開腔為莫帥講好說話：「莫耶斯需要時間，佢始終初嚟球隊，不過我深信佢可以帶領球隊走出困局。」車仔領隊摩連奴周五開記者會仲好風騷，話如果曼聯前鋒朗尼同尹佩斯都出得，最強對最強就好嘞；不過莫帥表明兩人唔踢得，摩佬咁講擺明寸曼聯殘陣啫。