【銅鑼灣→尖沙嘴】樂壇小強阮民安（Tommy）無處不在，前日4點幾佢現身銅鑼灣港鐵站，着住紅褸紅鞋鬼咁搶眼嘅佢，雖然戴咗cap帽扮低調，但佢嗰頂帽有大大個紅色「Tommy」字樣，想人唔知「小強」出沒都難啦，佢呢招果然使得，引到唔少途人眼望望。
頹晒雙下巴
當時正值繁忙時間，港鐵車廂裏面塞滿人，冇位坐嘅Tommy企近車門位置，全程耷低頭玩手機之外，最奇怪係30幾歲人嘅佢，竟然不停喺度咬中指。有專家話喺緊張、壓力、無聊情況下，有啲人會有咬手指習慣，頻頻被傳欠債嘅Tommy，唔知係咪因為經濟問題，令佢長期有壓力要咬手指呢？
Tommy搭到尖沙嘴站落車，不過佢喺站內兩頭騰行嚟行去，似乎唔知邊個出口至啱，搵咗成分幾鐘先出地面，然後佢走去搭某酒店式住宅嘅小巴，上車後又繼續咬手指兼玩手機，耷低頭嗰陣仲出現雙下巴，加上蒼白嘅面色，真係好頹爆囉！
採訪、攝影：梁繼光
